La parlamentaj grupoj de Junts pel Sí kaj CUP registris la 27an de oktobro proponon pri deklaro kiu devas utili por montri la komencon de transira periodo al la proklamo de la kataluna respubliko. La teksto akceptas ankoraŭ amendojn kaj la subtenon de aliaj grupoj de la parlamento, kaj oni planas voĉdoni pri ĝi dum plenumo antaŭ la 9a de novembro.

Junts pel Sí kaj CUP konstatas ke la ordono ricevita per la balotoj de la 27a de septembro devigas ilin labori por nova sendependa regno en formo de respubliko kataluna, kaj oni devos plenumi tiun taskon “per firmaj paŝoj, sen submeto al la politikaj aŭ juraj institucioj de la hispana ŝtato”. Ili emfazas ankaŭ en la deklaro ke necesas malfermi ĉi tiun “politikan horizonton” al ĉiuj sociaj kaj politikaj fortoj kiuj defendas la malfermon de konstituci-krea procezo civitana, partopren-invita kaj publika,

Jen la tuta propono pri rezolucio:

 

Jordi Turull i Negre kaj Marta Rovira i Vergés, respektive prezidanto kaj proparolanto de la Parlamenta Grupo de JUNTS PEL SÍ, kaj Antonio Baños i Boncompain kaj Anna Gabriel i Sabaté, respektive prezidanto kaj proparolanto de PG de CANDIDATURA D’UNITAT POPULAR, laŭ la artikoloj 164 kaj 165 de la Regularo de la Parlamento, prezentas la jenan proponon pri rezolucio kun la peto ke ĝi estu aprobita antaŭ la Plenumo de la Parlamento laŭ urĝa procedo. Por tiu efiko, ni petas ke oni samtempe urĝe kunvoku la kunsidon de proparolantoj.

Akorde kun la demokratia ordono ricevita la 27an de septembro, la subskribintaj parlamentaj grupoj prezentas ĉi tiun proponon pri rezolucio.

PROPONO PRI REZOLUCIO

La Parlamento de Katalunio:

UNUE konstatas ke la demokratia ordono ricevita per la pasintaj balotoj de la 27a de septembro 2015 sin bazas sur plimulteco de la parlamentaj fortoj kiuj havas la celon ke Katalunio iĝu sendependa regno kaj kun larĝa suverenisma plimulteco je voĉdonoj kaj parlamentaj sidlokoj kiuj estas por la komenco de konstituci-krea procezo ne subordigita.

DUE Ĝi deklaras solene la komencon de la procezo krei la katalunan regnon sendependan en formo de respubliko.

TRIE Ĝi proklamas la malfermon de konsistiga procezo civitanara, partopren-invita, publika, senekskluda kaj aktiva por prepari la bazojn de la estonta konstitucio de Katalunio.

KVARE Ĝi instigas la venontan registaron komenci antaŭ tridek tagoj la traktadon pri la leĝoj de la procezo konstituci-krea, de sociala sekureco kaj publika trezorejo.

SESE Per sia funkcio teni la suverenecon kaj esprimon de la konstituci-krea povo, ĝi ripetas ke ĉi tiu Parlamento kaj la procezo de demokratia malkonektado ne submetiĝos al la decidoj de la institucioj de la hispana ŝtato, pli precize de la Konstitucia Tribunalo, kiun ĝi konsideras nelegitimita kaj senkapabla pro ĝia sentenco de junio 2010 pri la Statuto de Aŭtonomio de Katalunio, aprobita per referendumo de la kataluna popolo, inter aliaj.

SEPE Ĝi adoptos la necesajn rimedojn por malferimi ĉi tiun procezon de malkonektado demokratia, popolamasa, subtenata kaj paca disde la regno Hispanio tiel ke ĝi povu transdoni la potencon al la civitanaro je ĉiuj niveloj kaj surbaze de partopreno malferma, aktiva kaj sen ekskludoj.

OKE Ĝi instigas la venontan registaron plenumi nur tiujn normojn aŭ regulojn emanintajn de ĉi tiu Ĉambro, legitimita kaj demokratia, kun la celo kirasi la fundamentajn rajtojn kiujn povus damaĝi la decidoj de la hispanaj institucioj.

NAŬE Ĝi manifestas la volon komenci pritraktadon kun la celo plenumi la demokratian ordonon pri kreado de kataluna ŝtato sendependa en formo de respubliko kaj, ĉi tiel mem, ĝi informas pri tiu volo al la hispanaj institucioj, al Eŭropa Unio kaj al la cetera internacia komunumo.

Palaco de la Parlamento, la 27a de oktobro 2015

Advertisements

Ĉar la kataluna aŭtonomia registaro ne povis okazigi referendumon pri la sendependeco kun la necesaj kondiĉoj pro la malhelpoj de la hispana registaro, Artur Mas, kunvokis balotojn kun la celo havi demokratian ordonon por konduki Katalunion al sendependeco. Lia partio, CDC, partoprenis koalicie kun ERC sub la marko Junts pel Sí (‘kune por la jeso’).

La 27am de septembro okazis balotado por la parlamento de Katalunio, kun sidejo en Barcelono. La partopreno estis rekorde alta: voĉdonis 4 130 196 homoj, 77% de la balotrajtigitoj. Junts pel Sí akiris 1 628 714 voĉdonoj (39.8%), C’s 736 364 (18%), PSC 523 283 (12.8%), Catalunya sí que es pot 367 613 (9%), PP 349 193 (8.5%), CUP 337 794 (8.3%) kaj UDC 103 293 (2.5%).

La balotlistoj por la sendependeco de Katalunio, Junts pel Sí kaj CUP, akiris 48.2% el la voĉdonoj. La partioj kontraŭ la sendependeco de Katalunio, Ciutadans, PSC kaj PP, akiris 39.31%. La aliaj partioj ne difinas sin rilate al ĉi tiu demando.

La novan parlamenton konsistigas 62 deputitoj de Junts pel Sí, 25 de Ciudadanoj, 16 de PSC, 11 Catalunya sí que es pot, 11 PP kaj 10 CUP. La sendependistoj Junts pel Sí kaj CUP atingas parlamentan plimulton per 72 parlamentanoj el 135.

Lundon la 26an de oktobro kunvenis la membroj de la nova parlamento, kaj elektis per 77 voĉdonoj sinjorinon Carme Forcadell prezidanto de la ĉambro de deputitoj (krom Junts pel Sí kaj CUP, 5 parlamentanoj de CSQEP voĉdonis por ŝi).

La politika partio CDC subskribis vojplanon kun alia partio, ERC. Tio signifis ke CDC devontigis sin pri la sendependeco de Katalunio en la venonta parlamenta periodo. Ĉi tiu paŝo tuŝis alian partion, UDC, kun kiu CDC de multaj jaroj agis en la koalicio CiU, ĉar en la venontaj balotoj UDC havos du alternativojn: aŭ subskribi la vojplanon aŭ konkuri sola en la balotoj kun propra programo.

Kiel ajn, UDC preferis esprimi sin pri la aferoj nur post la magistrataj balotoj okazintaj la 24an de majo. Tiam la estraro decidis demandi al siaj membroj per referendumo la 14an de junio pri ilia starpunkto rilate al la sendependeco. Sed la demando kiun oni formulis estis tiom konfuza ke ne restis klara ilia starpunkto. Tiam la liberalaj CDC petis ke la kristandemokrataj UDC montru klare sian pozicion. La kristandemokratoj respondis dirante ke ili forlasas la registaron de Katalunio ka rompas la koalicion kun CDC.

La pasintan 8an de aprilo Joana Ortega prezentis la rezulton de la unua soci-esploro pri religiaj aferoj en Katalunio.

La socia laikismo en Katalunio estas tre signifplena, laŭ la unua sondado pri religio kaj pri traktado de la religia diverseco, kiu montras ke 44.7% el la loĝantaro deklaras sin senreligia. La plej multaj katalunoj, kiuj asertas ke ili kredas je neniu religio -kio ne implicas ke ili ne identigas sin kun iu religio pro kulturaj kaj tradiciaj kialoj-, estas denaskaj katalunoj. Laŭ la datumoj de ĉi tiu sondado kiun prezentis la 8an de aprilo la vicprezidanto de la kataluna registaro, Joana Ortega, “la homoj naskitaj ekster Katalunio kaj Hispanio pli ofte deklaras sin kredantoj ol tiuj naskitaj en Katalunio”. La barometro indikas ke 18.2% el la katalunoj deklaras sin ateistoj, kaj 12% agnostikuloj. Ankoraŭ plej multas la homoj kiuj identigas sin kun katolikismo, 53% (precipe pro kulturaj kaj tradiciaj kialoj, kio ne implicas kredon kaj des malpli praktikadon); necesas aldoni tiujn kiuj praktikas aliajn religiojn (15%): 7.3% estas islamanoj, 2.5% protestantoj, 1.3% budaistoj,1.2% ortodoksuloj (rusoj, serboj, rumanoj…), 0.4% atestantoj de Jehovo, kaj 2.3% estas praktikantoj de religioj tre minoritataj.

Alia datumo kiun malkaŝas ĉi tiu esploro estas tio ke 66% el la katalunoj neniam partoprenas kultan ceremonion. Aliflanke 12% praktikas unu fojon semajne; 11.8 ĉeestas kultejon iun fojon monate, kaj 10% iun fojon jare. “En nia lando kreskas la religia plureco kaj ĉi tiu trajto identigas nin. Ni katalunoj komprenas la pritraktadon de la religia diverseco kiel ŝancon kaj la ekziston de pluraj religioj kiel fonton de kultura riĉaĵo”, diris la vicprezidanto de la kataluna registaro, Joana Ortega, dum la prezento pri ĉi tiu soci-esploro, komisiita al la Centro pri Opini-esploroj de la Departamento pri Regado kaj Instituciaj Rilatoj, kaj kiun oni realigis enketante 1 600 homojn pli ol 16-jarajn.

Laŭ la donitaj datumoj de ĉi tiu esplordosiero, la plej multaj katalunoj scias la ekziston de katolikismo (97,7%), islamo (77.6%) kaj budaismo (50%). Pri la ceteraj religioj, malpli ol 50% katalunoj scipovas nomi ilin. Rilate al la kono de la enketitoj pri la fakto ke ĉi tiuj religioj estas plantitaj en Katalunio, elstaras katolikismo (99.2%), islamo (90.3%), atestantoj de Jeho (83.7%) kaj protestantismo (73.6%). Laŭ demando al la enketatoj pri ilia grado de kono pri la diversaj religioj, nur katolikismo superas la mezon. Laŭ skalo inter 0 kaj 10, la enketitoj taksas sian konon pri katolikismo 6.59. Pri aliaj religioj, la sintakso neniam superas 3.5. Islamo, atestantoj de Jehovo kaj protestantismo estas la religiaj minoritatoj kiujn la enketatoj, laŭ ilia konsidero, plej bone konas. Sed 61.1% pensas ke estas tre aŭ sufiĉe grave ke civitanoj havu minimumajn konojn pri la diversaj religioj.

Al la plej multaj katalunoj, preskaŭ 90%, ŝajnas ke ekzistas respekto kaj bona rilato inter la diversaj religioj, kaj nur minoritato, 5.3% el la loĝantaro, perceptas streĉitecon kaj/aŭ malamikecon inter homoj de malsamaj religioj en ilia loĝloko. 52.9% konsideras ke la religia diverseco riĉigas la kulturan vivon de Katalunio kaj nur 14% kredas ke ĝi endanĝerigas la vivo-stilon de la lando. 60.5% taksas grave ke la publikaj administracioj puŝu kaj investu por la interreligia dialogo.

Joana Ortega proprigis al si la vortojn de la prezidanto de la Asista Konsilio pri la Religia Diverseco, Francesc Torralba, kiu asesoras la ĝeneralan direkcion pri religiaj aferoj de la Kataluna Registaro, en la senco ke, kiel ŝi diras: “Hodiaŭ ni ne parolu pri multkultura socio, sed pri interkultura kaj interreligia socio”, ĉar ni devas superi “amason de tradicioj kiuj iras sian propran vojon”, kaj ni devas investi por “interrilatado kun ĉiuj”. “Katalunio -diris Joana Ortega- estas ekzemplo pri kunvivado. En malmultaj lokoj de la mondo oni povas sperti tiom plene la religian diversecon.”

La politikaj partioj ERC kaj CDC subskribis komunan vojplanon por la suverenisma procezo. La dokumenton subskribis ankaŭ la organizaĵoj ANC, AMI, Òmnium Cultural kaj Súmate. Ĉi tiu interkonsento estas provizora, kaj oni subskribos definitivan tekston post tiam, kiam Artur Mas kunvokos oficiale la balotojn por la 27a de septembro de la nuna jaro, sed la nuna dokumento ja engaĝas la subskribintojn al komuna vojplano rilate al balotprogramo kaj al konduto post la balotoj.

Jen la teksto:

KOMUNA VOJPLANO DE LA KATALUNA SUVERENISMA PROCEZO

Ĉi tiu vojplano volas kunigi la suverenismajn organizaĵojn kiuj kunhavas la celon ke Katalunio komencu procezon de demokratia transiro tiel ke ĝi iĝu sendependa ŝtato se ĉi tion deziras la plej multaj civitanoj.

PLEBISCITAJ BALOTOJ

La balotoj okazontaj la 27an de septembro, kiuj havos plebiscitan karakteron, funkcios kiel laŭleĝa mekanismo por koni la volon de la kataluna popolo pri sia politika estonteco anstataŭante ĉi tiel la referendumon kies realigon oni malhelpis.

La balotprogramoj de la suverenismaj kandidatlistoj devas montri klare kaj reliefigite en la unua punkto, ke baloti por ĉi tiu listo egalas kiel favora voĉdono por la sendependeco de Katalunio.

La aksoj socia kaj nacia estas neapartigeblaj; pro tio necesas klopodi por reakiri socialan ŝtaton, precipe pri edukado, sanitara servo kaj pensioj kiel socialaj rajtoj kaj esencaj servoj publikaj.

Estas nerezigneble esprimi la nekonfuzeblan volon pri demokratia regenerado, diafaneco, raporto pri plenumitaj agoj, civitanara partopreno kaj batalo kontraŭ malhonesta konduto.

B. DISVOLVIĜO DE LA PROCEZO

Prilabori projekton de konstitucia teksto kun proksimume dekmonata tempolimo, pere de partoprenmekanismo kiu ebligu kunigi pli multajn volojn al malferma konstitucikrea procezo en kiu rekte partoprenu la civitanoj (Kataluna Konstitucia Konvencio) kaj dependanta de posta referendumo.

Krei kaj funkciigi la necesajn infrastrukturojn de la nova ŝtato: propra impostagentejo, sociala asekuro, transiro inter du leĝo-sistemoj, ekstera agado, transiro inter strategiaj strukturoj, socialaj kaj sanitaraj servoj, energiprovizado, sekureco…

Plenumi agojn de suvereneco necesajn por konstrui novan landon.

Ricevinte la ordonon de la balotintoj, komenca deklaro pri suvereneco kiel anonco kaj komenco de la procezo survoje al la proklamo pri nova ŝtato, aŭ Kataluna Respubliko, laŭ la terminoj kaj kondiĉoj esprimitaj en ĉi tiu vojplano. La procezo de demokratia transiro neniukaze dependas de la jura valideco aŭ eventualaj nuligoj pri ĉi tiu deklaro.

La procezo de nacia transiro survoje al la proklamo pri nova ŝtato aŭ Kataluna Respubliko, kiu komenciĝos kun la balotoj de la 27a de septembro 2015, kulminos en maksimuma periodo de 18 monatoj.

C. INSTITUCIAJ RILATOJ

Komenco de negocado kun la hispana ŝtato pri la novaj kondiĉoj: disdivido de aktivoj kaj pasivoj, rilatoj inter la novaj ŝtatoj.

Komenco de intertraktoj kun internaciaj subjektoj pri la agnosko kaj akcepto de la nova ŝtato.

Konservi atentan konduton rilate al alternativo por referendumo, flanke de la hispana ŝtato, pri la sendependeco de Katalunio.

D. KULMINIGI LA PROCEZON

Ĉe la fino de ĉi tiu procezo oni faros referendumon, kies rezulton oni devos obei, pri la konstitucia teksto kiu finrealigos la demokratian ordonon pri la kreado de nova ŝtato kataluna. La jesa rezulto de ĉi tiu referendumo kondukos al la proklamo pri la sendependeco.

Elekti novan parlamenton por la nova konstitucia framo.

Ekde ĉi tiu momento, negoci pri la novaj specoj de rilatoj kun Hispanio kaj Eŭropa Unio.

Barcelono, la 30a de marto 2015

La prezidanto de la kataluna registaro, Artur Mas, subskribis hodiaŭ la dekreton kiu kunvokas la konsulton kiun respondos la kataluna popolo la venontan 9an de novembro.

La pasintan 12an de decembro 2013 la partioj CiU, ERC, ICV-EUiA kaj CUP, okupantaj 87 el 135 sidlokoj de la kataluna parlamento interkonsentis pri konsulto al la popolo kun du demandoj: “Ĉu vi volas ke Katalunio iĝu ŝtato?” kaj, en jesa respondo al la unua demando, “Ĉu vi volas ke ĉi tiu ŝtato estu sendependa?”.

La ĉefministro de Hispanio, Mariano Rajoy, kontraŭstaras la okazigon de ĉi tiu konsulto. Dum vizito en Ĉinio en neformala interparolo kun ĵurnalistoj li diris ke Artur Mas metis sin en implikaĵon. En Madrido la vicĉefministro, Soraya Sáenz de Santamaría, asertis ke la ŝtato uzos ĉiujn disponeblajn rimedojn por malhelpi la okazigon de la konsulto.

La registaro de Katalunio jam havas juran framon por kunvoki la konsulton la venontan 9an de novembro. La parlamento aprobis hodiaŭ la leĝon pri konsultoj per parlamenta plimulto: 106 voĉdonis favore (el la partioj CiU, ERC, ICV-EUiA, CUP, PSC kaj la ne alskribita parlamentano J. I. Elena. Kontraŭe voĉdonis la partioj PP kaj Ciutadans per siaj 28 parlamentanoj.

Kun ĉi tiu leĝa instrumentonjam funkcianta la prezidanto de la kataluna registaro, Artur Mas, jam havas la ĉefan ilon por subskribi dum la venontaj horoj la dekreton pri kunvoko de la konsulto. Ankaŭ la hispana registaro,atente observas la movojn de la kataluna prezidanto kaj planis eksterordinarajn kunsidojn por komenci la manovrojn por faligi kaj la leĝon kaj la dekreton.

Centoj da homoj sin turnis al la pordoj de la parlamentejo kun la celo montri sian subtenon al la leĝo kaj postuli la okazigon de la konsulto

La Eŭropa Parlamento elektos la novan prezidanton de la Eŭropa Komisiono la venontan 16an de julio en Strasburgo. La novan prezidanton devas elekti la duono plus unu de la voĉdonoj de la 751 parlamentanoj kiujn la civitanoj elektos la proksiman 25an de majo.

Estas kvin kandidatoj por la prezido de la Eŭropa Komisiono: Jean-Claude Juncker (Eŭropa Popola Partio), Martin Schulz (Partio de la Eŭropaj Socialdemokratoj), Guy Verhofstadt (Interligo de liberaluloj kaj demokratoj por Eŭropo), Ska Keller (Eŭropaj Verduloj) kaj Alexis Tsipras (Eŭropa Maldekstro).

Iam ili diris kelkajn vortojn pri la procezo kiun trapasas nun Katalunio. Jen ilia opinio pri la afero:

Jean-Claude Juncker
Li estas kandidato de la Eŭropa Popola Partio (en kiu membras UDC, reganta Katalunion en koalicio kun CDC). Li plene kundividas la kriterion de la hispana ĉefministro, Mariano Rajoy, pri la plu-restado de Katalunio en Eŭropa Unio. Li diras ke provinco kiu iĝas sendependa regno ne iĝas “aŭtomate” membro de Eŭropa Unio kaj de la eŭrozono.

Martin Schulz
Li neniam defendis la rajton de Katalunio decidi sian sorton. Dum vizito en Barcelono pro lia posteno de prezidanto de la EU-parlamento li parolis pri la procezo sen kompromiti sian pozicion. Li preferis ne paroli pri la konflikto kun Hispanio pretekstante ke li ne havas solvon por tiu problemo.

Guy Verhofstadt
Li ne montris personan opinion pri la afero. Sed la Eŭropa Liberala Partio kaj la Liberala Internacio en pluraj okazoj defendis la konsulton al la kataluna popolo. Vizitante Barcelonon la ĵusan 14an de majo, li diris ke oni devas preni en la kalkulon la opinion kiun la katalunoj esprimos per ajna kanalo. Li kaptis la okazon por peti dialogon inter la registaroj de Katalunio kaj Hispanio. Graham Watson, prezidanto de la Eŭropaj Liberaluloj ne vidas Katalunion en Eŭropa Unio kiel problemon.

Ska Keller
Dum ĵusa vizito en Katalunio ŝi sin montris favora al la konsulto kiun oni planas okazigi la venontan 9an de novembro. Ŝi esprimis la deziron ke sendependa Katalunio estu membro de Eŭropa Unio. Krome, ŝi certigis ke se ŝi estos elektita, ŝi petos ke la hispana registaro ne malhelpu la rajton de katalunoj decidi sian politikan statuson.

Alexis Tsipras
Li parolis pri la afero en novembro 2012 dum balotkampanjo de ICV-EUi A por la kataluna parlamento. Tiam li sin montris por la rajto decidi. Al la demando “kion vi favoros, la katalunajn instituciojn aŭ la hispanajn potencojn kiuj volas malpermesi la konsulton?” li respondis jene: “Ni respektos la decidon kiun prenos la kataluna popolo”.

La asista konsilio por la nacia transiro (CATN) publikigis novan esplordosieron, legeblan en la kataluna, en la kastilia kaj en la angla. Nun pri la alternativaj situacioj en kiuj povus sin trovi sendependa Katalunio rilate al Eŭropa Unio. La cerbumkomitato konsideras kvar hipotezajn situaciojn: a) Katalunio aŭtomate plu restus en Eŭropa Unio; b) Katalunio restus provizore ekstere kaj rapide reenirus; c) Katalunio restus ekstere kaj povus peti ordinaran membriĝon, kaj d) ekskludo.

Dum la prezento pri la informo, la prezidanto de la konsilio, Carles Viver i Pi-Sunyer, sin montris skeptika pri la tria kaj kvara hipotezoj. La dosiero konkludas ke la tezoj laŭ kiuj sendependa Katalunio restus ekster Eŭropa Unio ne havas juran bazon. La cerbumkomitato substrekas la pragmatismon de Uniaj institucioj kaj konsideras ke la decido pri la sorto de Katalunio ne dependos de juraj sed de politikaj kriterioj.

CATN kredas plej verŝajne ke Katalunio restos en la Unio kaj, depende de Hispanio, povus pasigi tempon ekstere sed konservante la eŭropan juron. Oni konjektas pri la hispana decido vetoi la eniron de Katalunio en Eŭropan Union, sed la konsilio kredas ke tiu decido nur malhelpos la pluan restadon aŭtomatan en la Unio. Sed la forto de ĉi tiu vetoo ne povus devigi Katalunion resti ekster transira reĝimo kaj vici post Serbio aŭ Turkio.

La hispana ministerio pri justico havis blokitaj ekde 2010 ĉirkaŭ 500 000 petojn pri civitaniĝo. Nun, ekde februaro 2014, ĝi komencis intensivan planon trakti ĉiujn ĉi petojn precipe, kaj kurioze, en Katalunio, kie estas 145 000 el 500 000 de tuta Hispanio.

La fondaĵo Nous Catalans (novaj katalunoj) de longe avertas pri la strategio de la hispana registaro kun rilato al la enmigrintoj kun la celo influi la rezulton de referendumo okazonta nunjare kaj malhelpi la sendependiĝon de Katalunio. La prezidanto de ĉi fondaĵo, Àngel Colom, jam avertis unu jaron antaŭe pri tiu strategio sekvita de Kanado kelkajn momentojn antaŭ la referendumo en Kebekio. Oni donis kanadan civitanecon al multaj enmigrintoj, kaj ni scias ke multaj el ili voĉdonis kontraŭe. Kaj aldonis: “Mi ne bedaŭras ke oni akcelu la procezon por homoj kiuj rajtas je la civitaneco, sed la afero estas suspektinda. Mi estas certa ke oni provos movilizi la enmigrintojn kontraŭ la sendependiĝo. Tial la katalunismo devas labori, kaj bonŝance de longe laboras, por informi la ĵusajn enmigrintojn pri la procezo.”