Archive

Uncategorized

Artur Mas, eksprezidanto de la kataluna registaro akuzis la hispanan registaron kaj kelkajn instituciojn de la hispana ŝtato pri klopodo prezenti la katalunan socion violentplena por krei mensan framon en la hispana socio kiu pravigu intervenon de la ŝtato sur la kataluna publika administracio.

“Ili klopodas krei la impreson ke la sendependisma movado estas violenta kaj atakema -dum ĉi tiaj estas ili- kun la celo interveni poste kaj pravigi eventualan intervenon far la ŝtato en Katalunio, kion la kataluna socio ĝenerale malakceptos”, diris Artur Mas.

Laŭ la prezidinto necesas kontraŭbatali ĉi tiun strategion, ĉar se iu agas atakante, ĉi tiu estas precize la hispana ŝtato kaj la Popola Partio, kaj se iu faras kontraŭleĝan militon persekutante ideojn kaj homojn, ĉi tiu estas la hispana registaro, la Popola Partio kaj kelkaj institucioj de la hispana ŝtato.

Artur Mas ilustris sian tezon per la ekzemplo de la ĉefa prokuroro de Barcelono, Ana Maria Magaldi, kiu faris gazetaran konferencon priskribante ĉi tiun violentan etoson, kiam, oni povas pruvi per la bildoj ke krom riproĉinda insulto ŝi ricevis neniun atakon.

“Prezenti ĉi tion kiel ekzemplo pri violento kaj atakemo en Katalunio estas grandega mensogo kaj maniero eluzi anekdoton por pravigi intervenon de la ŝtato”, li diris.

Mas ankaŭ certigis ke la hispana ŝtato eraras ne konsiderante la katalunan registaron valida kunparolanto. “Ili ĉiam paradas sian demokratan sintenon, sed ili forgesas ke la nunan parlamenton de Katalunio konsistigis balotoj kie partoprenis 75% de la loĝantaro, kaj kiu donis absolutan plimulton favore al la sendependeco”, li argumentis. Laŭ li ĉi tio estas plua pruvo pri la manko de demokrata sinteno de la hispana registaro.

Artur Mas esprimis ĉi tiujn ideojn antaŭ ol prononci prelegon sub la titolo “Katalunio kaj EU en la 21a jarcerto” en la fakultato pri juro de la Aŭtonoma Universitato de Madrido.

La ministro pri defendo de Hispanio, María Dolores de Cospedal, pretigas registron por centralizi la datumojn pri ĉiuj civitanoj kiuj promesis aŭ ĵuris fidelecon al la hispana flago. Kiel publikigas la Oficiala Bulteno de la Ŝtato (BOE) de ĉi lundo, la ministrejo pretigas modifon pri la leĝo 1445/2004, de la 16a de majo, por aldoni sepan apartaĵon kie oni klarigas la ŝlosilojn de ĉi tiu nova datumbazo.

La teksto indikas ke “oni kreos registron centralizitan pri la hispanoj kiuj faris ĵuron aŭ promeson antaŭ la Flago de Hispanio, kun la celo kolekti kaj prilabori aŭtomate la personajn datumojn”.

Krome, oni indikas ankaŭ ke la ĝenerala teknika sekretario de la ministrejo pri defendo estos la responsa organo pri ĉi tiu registro.

La registro kolektos nomon, familinomojn, identigilo-numeron, daton kaj lokon de naskiĝo, aktualan adreson, poŝtkodon, municipon kaj provincon de loĝado, telefonnumeron kaj/aŭ retpoŝtan adreson, inter aliaj datumoj.

La ministra ordono ekvalidos ses monatojn post sia publikiĝo en la oficialo bulteno de la ŝtato, sekve la 16an de julio 2017. La dispozicion subskribas la ministro pri defendo, María Dolores de Cospedal.

La pasintan 6an de oktobro la kataluna parlamento aprobis rezolucion kiu instigas la okazigon de referendumo pri sendependeco. “La parlamento instigas la registaron okazigi decidan referendumon pri la sendependeco de Katalunio antaŭ oktobro 2017 kun klara demando kaj binara respondo” Ĉi tiel tekstas eltranĉaĵo de la teksto aprobita per la favoraj voĉdonoj de Junts pel Sí kaj CUP. Catalunya Sí Que Es Pot voĉdonis blanke (nek favore nek kontraŭe) kaj la ceteraj grupoj (PP, PSC kaj C’S) ne voĉdonis. La parlamentanoj de C’S, krome levis la manojn montrante malkonsenton.

Per ĉi tiu rezolucio la registaro sin devontigas aranĝi ĉiujn aferojn kiuj ebligos la referendumon. La unua afero estis konsistigi komisionon kiu “puŝu, kontrolu kaj realigu la referendumon”.

Oni kreos ankaŭ komisionon de fakuloj kun la tasko atenti la procezon de sindeterminigo. Ĝin partoprenos fakuloj de la internacia sfero kiuj bone konas similajn procezojn. “La celo de ĉi tiu komisiono estas konstati la demokratiajn garantiojn de la tuta procezo, inkluzive la referendumon, far la katalunaj institucioj kaj hispana ŝtato”, diras la teksto. Ĉi tiu komisiono devas estis fondita antaŭ la fino de la jaro 2016 kaj faros publikan konferencon per kiu ĝi elmontros la celojn.

La parlamenta plejmulto kiun konsistigas Junts Pel Sí kaj CUP decidis merkredon la 27an de julio transpasi la ruĝan linion kiun difinis la Konstitucia Tribunalo de Hispanio. La detputitoj por ĉi tiuj partioj, Jordi Turull kaj Anna Gabriel petis ke oni aldonu al la tagordo la debaton kaj aprobon pri la konkludoj de konstitucikrea komisiono.

La parlamentaj grupoj de Junts Pel Sí kaj CUP interkonsentis ke ili petos modifon pri la tagordon de la plenumo kiu okazis merkredon, por debati kaj aprobi la konkludojn de la esplorkomisiono, kiuj desegnas la vojplanon de Katalunio al sendependeco. La Konstitucia Tribunalo de Hispanio jam esprimis la malpermeson debati kaj aprobi ilin en la parlamento. La provizora ĉefministro de Hispanio, Mariano Rajoy, diris ke ĉi tiu okazaĵo estas “gravega defio”.

Pro la balotoj okazintaj la 27an de septembro 2015, neniu partio havis sufiĉe multajn parlamentanojn kiuj povus elekti prezidanton. Junts Pel Sí, estis la partio kiu akiris plej bonajn rezultojn, kaj pro la sendependisma programo povis interkonsenti nur kun la ekstremliva partio CUP, ankaŭ sendependisma. Sed ĉi tiu partio ne volis elekti Artur Mas por la posteno de prezidanto, ĉar ĝiaj membroj konsideras ke li reprezentas novliberalismon kaj la koruptokazojn kiuj estas ligitaj al la partio CDC.

Finfine Artur Mas decidis rezigni pri la prezidanteco kaj elektis por sia loko la sampartianon Carles Puigdemont, kiun la parlamento elektis la 9an de januaro 2016. Puigdemont estis origine ĵurnalisto kaj estis urbestro de Ĝirono kaj membro de la kataluna parlamento kiam li estis elektita por la nova posteno. Li ĉiam estis por la sendependeco kaj la internacia gazetaro konsideras lin eĉ pli sendpendisma ol la eksprezidanto Mas.

La registaron konsistigos tri ĉefajn ministroj, de kiuj dependos la ceteraj ministroj. Oriol Junqueras (estro de la partio Esquerra) estas vicprezidanto de la registaro kaj ministro pri ekonomio kaj trezorejo. Neus Munté, el la partio CDC, estos ministro pri prezidanteco kaj proparolanto de la registaro. Raül Romeva, sendependa je partio, estas ministro pri aferoj eksteraj, instituciaj kaj diafaneco.

La prezidanto Puigdemont anoncis ke la registaro de deklaros la sendpendecon dum la nuna parlamenta periodo ĉar ne estas elmontrite ke plejmulto el la katalunoj volas sendependeco, kvankam por tio estas almenaŭ  48% el la balotintoj,  sed la registaro instigos procezon de publika partopreno por la kreado de nova konstitucio. La referendumo pro ĉi tiu konstitucio ludos la rolon de referendumo pri sendependeco. Li akceptas ankaŭ organizi interkonsente kun la hispana registaro klaran referendumon pri sendependeco.

La parlamentaj grupoj de Junts pel Sí kaj CUP registris la 27an de oktobro proponon pri deklaro kiu devas utili por montri la komencon de transira periodo al la proklamo de la kataluna respubliko. La teksto akceptas ankoraŭ amendojn kaj la subtenon de aliaj grupoj de la parlamento, kaj oni planas voĉdoni pri ĝi dum plenumo antaŭ la 9a de novembro.

Junts pel Sí kaj CUP konstatas ke la ordono ricevita per la balotoj de la 27a de septembro devigas ilin labori por nova sendependa regno en formo de respubliko kataluna, kaj oni devos plenumi tiun taskon “per firmaj paŝoj, sen submeto al la politikaj aŭ juraj institucioj de la hispana ŝtato”. Ili emfazas ankaŭ en la deklaro ke necesas malfermi ĉi tiun “politikan horizonton” al ĉiuj sociaj kaj politikaj fortoj kiuj defendas la malfermon de konstituci-krea procezo civitana, partopren-invita kaj publika,

Jen la tuta propono pri rezolucio:

 

Jordi Turull i Negre kaj Marta Rovira i Vergés, respektive prezidanto kaj proparolanto de la Parlamenta Grupo de JUNTS PEL SÍ, kaj Antonio Baños i Boncompain kaj Anna Gabriel i Sabaté, respektive prezidanto kaj proparolanto de PG de CANDIDATURA D’UNITAT POPULAR, laŭ la artikoloj 164 kaj 165 de la Regularo de la Parlamento, prezentas la jenan proponon pri rezolucio kun la peto ke ĝi estu aprobita antaŭ la Plenumo de la Parlamento laŭ urĝa procedo. Por tiu efiko, ni petas ke oni samtempe urĝe kunvoku la kunsidon de proparolantoj.

Akorde kun la demokratia ordono ricevita la 27an de septembro, la subskribintaj parlamentaj grupoj prezentas ĉi tiun proponon pri rezolucio.

PROPONO PRI REZOLUCIO

La Parlamento de Katalunio:

UNUE konstatas ke la demokratia ordono ricevita per la pasintaj balotoj de la 27a de septembro 2015 sin bazas sur plimulteco de la parlamentaj fortoj kiuj havas la celon ke Katalunio iĝu sendependa regno kaj kun larĝa suverenisma plimulteco je voĉdonoj kaj parlamentaj sidlokoj kiuj estas por la komenco de konstituci-krea procezo ne subordigita.

DUE Ĝi deklaras solene la komencon de la procezo krei la katalunan regnon sendependan en formo de respubliko.

TRIE Ĝi proklamas la malfermon de konsistiga procezo civitanara, partopren-invita, publika, senekskluda kaj aktiva por prepari la bazojn de la estonta konstitucio de Katalunio.

KVARE Ĝi instigas la venontan registaron komenci antaŭ tridek tagoj la traktadon pri la leĝoj de la procezo konstituci-krea, de sociala sekureco kaj publika trezorejo.

SESE Per sia funkcio teni la suverenecon kaj esprimon de la konstituci-krea povo, ĝi ripetas ke ĉi tiu Parlamento kaj la procezo de demokratia malkonektado ne submetiĝos al la decidoj de la institucioj de la hispana ŝtato, pli precize de la Konstitucia Tribunalo, kiun ĝi konsideras nelegitimita kaj senkapabla pro ĝia sentenco de junio 2010 pri la Statuto de Aŭtonomio de Katalunio, aprobita per referendumo de la kataluna popolo, inter aliaj.

SEPE Ĝi adoptos la necesajn rimedojn por malferimi ĉi tiun procezon de malkonektado demokratia, popolamasa, subtenata kaj paca disde la regno Hispanio tiel ke ĝi povu transdoni la potencon al la civitanaro je ĉiuj niveloj kaj surbaze de partopreno malferma, aktiva kaj sen ekskludoj.

OKE Ĝi instigas la venontan registaron plenumi nur tiujn normojn aŭ regulojn emanintajn de ĉi tiu Ĉambro, legitimita kaj demokratia, kun la celo kirasi la fundamentajn rajtojn kiujn povus damaĝi la decidoj de la hispanaj institucioj.

NAŬE Ĝi manifestas la volon komenci pritraktadon kun la celo plenumi la demokratian ordonon pri kreado de kataluna ŝtato sendependa en formo de respubliko kaj, ĉi tiel mem, ĝi informas pri tiu volo al la hispanaj institucioj, al Eŭropa Unio kaj al la cetera internacia komunumo.

Palaco de la Parlamento, la 27a de oktobro 2015

Ĉar la kataluna aŭtonomia registaro ne povis okazigi referendumon pri la sendependeco kun la necesaj kondiĉoj pro la malhelpoj de la hispana registaro, Artur Mas, kunvokis balotojn kun la celo havi demokratian ordonon por konduki Katalunion al sendependeco. Lia partio, CDC, partoprenis koalicie kun ERC sub la marko Junts pel Sí (‘kune por la jeso’).

La 27am de septembro okazis balotado por la parlamento de Katalunio, kun sidejo en Barcelono. La partopreno estis rekorde alta: voĉdonis 4 130 196 homoj, 77% de la balotrajtigitoj. Junts pel Sí akiris 1 628 714 voĉdonoj (39.8%), C’s 736 364 (18%), PSC 523 283 (12.8%), Catalunya sí que es pot 367 613 (9%), PP 349 193 (8.5%), CUP 337 794 (8.3%) kaj UDC 103 293 (2.5%).

La balotlistoj por la sendependeco de Katalunio, Junts pel Sí kaj CUP, akiris 48.2% el la voĉdonoj. La partioj kontraŭ la sendependeco de Katalunio, Ciutadans, PSC kaj PP, akiris 39.31%. La aliaj partioj ne difinas sin rilate al ĉi tiu demando.

La novan parlamenton konsistigas 62 deputitoj de Junts pel Sí, 25 de Ciudadanoj, 16 de PSC, 11 Catalunya sí que es pot, 11 PP kaj 10 CUP. La sendependistoj Junts pel Sí kaj CUP atingas parlamentan plimulton per 72 parlamentanoj el 135.

Lundon la 26an de oktobro kunvenis la membroj de la nova parlamento, kaj elektis per 77 voĉdonoj sinjorinon Carme Forcadell prezidanto de la ĉambro de deputitoj (krom Junts pel Sí kaj CUP, 5 parlamentanoj de CSQEP voĉdonis por ŝi).

La politika partio CDC subskribis vojplanon kun alia partio, ERC. Tio signifis ke CDC devontigis sin pri la sendependeco de Katalunio en la venonta parlamenta periodo. Ĉi tiu paŝo tuŝis alian partion, UDC, kun kiu CDC de multaj jaroj agis en la koalicio CiU, ĉar en la venontaj balotoj UDC havos du alternativojn: aŭ subskribi la vojplanon aŭ konkuri sola en la balotoj kun propra programo.

Kiel ajn, UDC preferis esprimi sin pri la aferoj nur post la magistrataj balotoj okazintaj la 24an de majo. Tiam la estraro decidis demandi al siaj membroj per referendumo la 14an de junio pri ilia starpunkto rilate al la sendependeco. Sed la demando kiun oni formulis estis tiom konfuza ke ne restis klara ilia starpunkto. Tiam la liberalaj CDC petis ke la kristandemokrataj UDC montru klare sian pozicion. La kristandemokratoj respondis dirante ke ili forlasas la registaron de Katalunio ka rompas la koalicion kun CDC.

La pasintan 8an de aprilo Joana Ortega prezentis la rezulton de la unua soci-esploro pri religiaj aferoj en Katalunio.

La socia laikismo en Katalunio estas tre signifplena, laŭ la unua sondado pri religio kaj pri traktado de la religia diverseco, kiu montras ke 44.7% el la loĝantaro deklaras sin senreligia. La plej multaj katalunoj, kiuj asertas ke ili kredas je neniu religio -kio ne implicas ke ili ne identigas sin kun iu religio pro kulturaj kaj tradiciaj kialoj-, estas denaskaj katalunoj. Laŭ la datumoj de ĉi tiu sondado kiun prezentis la 8an de aprilo la vicprezidanto de la kataluna registaro, Joana Ortega, “la homoj naskitaj ekster Katalunio kaj Hispanio pli ofte deklaras sin kredantoj ol tiuj naskitaj en Katalunio”. La barometro indikas ke 18.2% el la katalunoj deklaras sin ateistoj, kaj 12% agnostikuloj. Ankoraŭ plej multas la homoj kiuj identigas sin kun katolikismo, 53% (precipe pro kulturaj kaj tradiciaj kialoj, kio ne implicas kredon kaj des malpli praktikadon); necesas aldoni tiujn kiuj praktikas aliajn religiojn (15%): 7.3% estas islamanoj, 2.5% protestantoj, 1.3% budaistoj,1.2% ortodoksuloj (rusoj, serboj, rumanoj…), 0.4% atestantoj de Jehovo, kaj 2.3% estas praktikantoj de religioj tre minoritataj.

Alia datumo kiun malkaŝas ĉi tiu esploro estas tio ke 66% el la katalunoj neniam partoprenas kultan ceremonion. Aliflanke 12% praktikas unu fojon semajne; 11.8 ĉeestas kultejon iun fojon monate, kaj 10% iun fojon jare. “En nia lando kreskas la religia plureco kaj ĉi tiu trajto identigas nin. Ni katalunoj komprenas la pritraktadon de la religia diverseco kiel ŝancon kaj la ekziston de pluraj religioj kiel fonton de kultura riĉaĵo”, diris la vicprezidanto de la kataluna registaro, Joana Ortega, dum la prezento pri ĉi tiu soci-esploro, komisiita al la Centro pri Opini-esploroj de la Departamento pri Regado kaj Instituciaj Rilatoj, kaj kiun oni realigis enketante 1 600 homojn pli ol 16-jarajn.

Laŭ la donitaj datumoj de ĉi tiu esplordosiero, la plej multaj katalunoj scias la ekziston de katolikismo (97,7%), islamo (77.6%) kaj budaismo (50%). Pri la ceteraj religioj, malpli ol 50% katalunoj scipovas nomi ilin. Rilate al la kono de la enketitoj pri la fakto ke ĉi tiuj religioj estas plantitaj en Katalunio, elstaras katolikismo (99.2%), islamo (90.3%), atestantoj de Jeho (83.7%) kaj protestantismo (73.6%). Laŭ demando al la enketatoj pri ilia grado de kono pri la diversaj religioj, nur katolikismo superas la mezon. Laŭ skalo inter 0 kaj 10, la enketitoj taksas sian konon pri katolikismo 6.59. Pri aliaj religioj, la sintakso neniam superas 3.5. Islamo, atestantoj de Jehovo kaj protestantismo estas la religiaj minoritatoj kiujn la enketatoj, laŭ ilia konsidero, plej bone konas. Sed 61.1% pensas ke estas tre aŭ sufiĉe grave ke civitanoj havu minimumajn konojn pri la diversaj religioj.

Al la plej multaj katalunoj, preskaŭ 90%, ŝajnas ke ekzistas respekto kaj bona rilato inter la diversaj religioj, kaj nur minoritato, 5.3% el la loĝantaro, perceptas streĉitecon kaj/aŭ malamikecon inter homoj de malsamaj religioj en ilia loĝloko. 52.9% konsideras ke la religia diverseco riĉigas la kulturan vivon de Katalunio kaj nur 14% kredas ke ĝi endanĝerigas la vivo-stilon de la lando. 60.5% taksas grave ke la publikaj administracioj puŝu kaj investu por la interreligia dialogo.

Joana Ortega proprigis al si la vortojn de la prezidanto de la Asista Konsilio pri la Religia Diverseco, Francesc Torralba, kiu asesoras la ĝeneralan direkcion pri religiaj aferoj de la Kataluna Registaro, en la senco ke, kiel ŝi diras: “Hodiaŭ ni ne parolu pri multkultura socio, sed pri interkultura kaj interreligia socio”, ĉar ni devas superi “amason de tradicioj kiuj iras sian propran vojon”, kaj ni devas investi por “interrilatado kun ĉiuj”. “Katalunio -diris Joana Ortega- estas ekzemplo pri kunvivado. En malmultaj lokoj de la mondo oni povas sperti tiom plene la religian diversecon.”

La politikaj partioj ERC kaj CDC subskribis komunan vojplanon por la suverenisma procezo. La dokumenton subskribis ankaŭ la organizaĵoj ANC, AMI, Òmnium Cultural kaj Súmate. Ĉi tiu interkonsento estas provizora, kaj oni subskribos definitivan tekston post tiam, kiam Artur Mas kunvokos oficiale la balotojn por la 27a de septembro de la nuna jaro, sed la nuna dokumento ja engaĝas la subskribintojn al komuna vojplano rilate al balotprogramo kaj al konduto post la balotoj.

Jen la teksto:

KOMUNA VOJPLANO DE LA KATALUNA SUVERENISMA PROCEZO

Ĉi tiu vojplano volas kunigi la suverenismajn organizaĵojn kiuj kunhavas la celon ke Katalunio komencu procezon de demokratia transiro tiel ke ĝi iĝu sendependa ŝtato se ĉi tion deziras la plej multaj civitanoj.

PLEBISCITAJ BALOTOJ

La balotoj okazontaj la 27an de septembro, kiuj havos plebiscitan karakteron, funkcios kiel laŭleĝa mekanismo por koni la volon de la kataluna popolo pri sia politika estonteco anstataŭante ĉi tiel la referendumon kies realigon oni malhelpis.

La balotprogramoj de la suverenismaj kandidatlistoj devas montri klare kaj reliefigite en la unua punkto, ke baloti por ĉi tiu listo egalas kiel favora voĉdono por la sendependeco de Katalunio.

La aksoj socia kaj nacia estas neapartigeblaj; pro tio necesas klopodi por reakiri socialan ŝtaton, precipe pri edukado, sanitara servo kaj pensioj kiel socialaj rajtoj kaj esencaj servoj publikaj.

Estas nerezigneble esprimi la nekonfuzeblan volon pri demokratia regenerado, diafaneco, raporto pri plenumitaj agoj, civitanara partopreno kaj batalo kontraŭ malhonesta konduto.

B. DISVOLVIĜO DE LA PROCEZO

Prilabori projekton de konstitucia teksto kun proksimume dekmonata tempolimo, pere de partoprenmekanismo kiu ebligu kunigi pli multajn volojn al malferma konstitucikrea procezo en kiu rekte partoprenu la civitanoj (Kataluna Konstitucia Konvencio) kaj dependanta de posta referendumo.

Krei kaj funkciigi la necesajn infrastrukturojn de la nova ŝtato: propra impostagentejo, sociala asekuro, transiro inter du leĝo-sistemoj, ekstera agado, transiro inter strategiaj strukturoj, socialaj kaj sanitaraj servoj, energiprovizado, sekureco…

Plenumi agojn de suvereneco necesajn por konstrui novan landon.

Ricevinte la ordonon de la balotintoj, komenca deklaro pri suvereneco kiel anonco kaj komenco de la procezo survoje al la proklamo pri nova ŝtato, aŭ Kataluna Respubliko, laŭ la terminoj kaj kondiĉoj esprimitaj en ĉi tiu vojplano. La procezo de demokratia transiro neniukaze dependas de la jura valideco aŭ eventualaj nuligoj pri ĉi tiu deklaro.

La procezo de nacia transiro survoje al la proklamo pri nova ŝtato aŭ Kataluna Respubliko, kiu komenciĝos kun la balotoj de la 27a de septembro 2015, kulminos en maksimuma periodo de 18 monatoj.

C. INSTITUCIAJ RILATOJ

Komenco de negocado kun la hispana ŝtato pri la novaj kondiĉoj: disdivido de aktivoj kaj pasivoj, rilatoj inter la novaj ŝtatoj.

Komenco de intertraktoj kun internaciaj subjektoj pri la agnosko kaj akcepto de la nova ŝtato.

Konservi atentan konduton rilate al alternativo por referendumo, flanke de la hispana ŝtato, pri la sendependeco de Katalunio.

D. KULMINIGI LA PROCEZON

Ĉe la fino de ĉi tiu procezo oni faros referendumon, kies rezulton oni devos obei, pri la konstitucia teksto kiu finrealigos la demokratian ordonon pri la kreado de nova ŝtato kataluna. La jesa rezulto de ĉi tiu referendumo kondukos al la proklamo pri la sendependeco.

Elekti novan parlamenton por la nova konstitucia framo.

Ekde ĉi tiu momento, negoci pri la novaj specoj de rilatoj kun Hispanio kaj Eŭropa Unio.

Barcelono, la 30a de marto 2015